Edition d'un acte

Nous official de la court de Besançon faisons scavoir à tous que, par devant Guillame Perriot de Rougemont demourant à Montbeliart clerc notaire juré de ladicte court de Besançon nostre juré, mandement et commandement especiaul auquelz quant ad ce et plus grandz choses nous avons commis et commettons noz voies et à luy avons adjoustée et adjoustons foy pleinière en ceste partie. Pour ce en droit personnellement establiz et ad ce especiaulment venant noble homme Thiebaudt de Vandelincourt escuier, non constroint, decephu ou en aucune maniere circumvenuz, ains de son plain grée, pure, franche et liberal volunté, pour eviter ses dommages et en aultres manières myeulx survenir et supporter ses fais, negoces et besoingnes a congneu, confesser, congnoist et confesse par ces presentes lettres avoir vendu, cedez, concedez oultroiez et delivrez et par ces presentes lettres par toutes melleurs voies, forme, maniere et condicion que faire ce peult ce que vendue perpetuelle & irrevocable se peult myeulx et doit faire, vendt, cede, concede, oultroit, delivre & transporte perpetuellement & irrevocablement à nobles hommes George <span class="text-decoration-line-through">bastard</span> de Monstereul, à Johan et Henry ses fils legittimes et à chacun d’eulx, tant coniunctement comme divisement, absens, noble et discrete personne messire Guyd dudict Monstereul pbre curé dudit lieu, filz dudict George et frere legitime desdicts Johan et Henry et ledict notaire presens stipulans et acceptans pour lesdis George, sesdis fils, pour eulx, leurs hoirs et ayans cause tout ce entierement sans rien excepter, reservez ne retenir qu’il, ledit Thiebaudt ait, tient, possede, peult et doit avoir, tenir, possedez et que luy compete, appartient, peult et doit competer et appartenir en manieres quelcunques estant et seants ès ville, sur finage et territoire de Boroingne près de Morvillers ou diocese dudit Besançon, tant en hommes, femmes, bourgeois, bourgeoises, hommaiges, fours, molins, rivieres, cours d’eaug, crouvées, gelines, rentes, censes, revenuées seignouriez, justice moienne, basse, maix, maisons, granges, estableries, champs, preels, oches, cultif, vergiers, bois, terres aribles, non aribles et aultres tenemens quelcunques, ensembles leurs fonds, proprietée et appartenances ainsin qu’ilz se comportent et estandent du long et large qu’il sont et tant de fiedz que de franc alieu, assavoir tout ce qu’il tient oudit lieu, tant du fied de très hault et puissant seigneur monss. le duc d’Osteriche qu’aultrement, en priant & requerant très humblement audit monss. d’Osteriche et aultres ausquelx le fait competera que ad ce present vendaige se vuillent consentir et bailler leur consentement, laquelle vendue ledit Thiebault a fait ausdis George, Johan et Henry acheteurs pour le pris et somme de cent florins de Rin, justes et de poidz que ledit Thiebauldt vendeur en ait congneu, confessez, congnoit et confesse par ces presentes lettres avoir eu & receu en effectz desdits acheteurs par les mains dudit messire Guyd et s’en est tenuz et tient pour bien paier, contentz et satisfait entierement & en aquitte et quitte par ces mesmes presentes lettres lesdits George, Johan, Henry acheteurs, leurs hoirs, ayans cause et tous, devestant soy ledit Thiebaudt vendeur desdits seignouries, rentes, censes, revenuées, maix, maisons, granges, cultif et choses dessusdictes, ensemble de leurs dis fondz proprietées et appartenances, et lesdis George, Johan et Henry, pour eulx, leurdis hoirs et ayans cause investant, mis et mettant par le baibe [baile] et tradiccion de ces presentes lettres en vraye, reelle, actualle et corporelle possession, jouisance et saisine ; demeurant ledit Thiebaudt vendeur lesdites maisons, granges, estableries, le cultif propres d’icelles ensemble d’ung champz, acquis des heritiers de feu noble escuiez Phillebert de Roppes, de franc alieu le demourant et résiduz de fied, comme dit est ce peult apparoir par les lettres. Promettant ledit Thiebaudt vendeur les foy et serment de son corpz pour en donner et touchier corporellement aux mains dudit nostre juré commandement sollemnée et legitimes stipulacion sur ce entervenans et soubz les expresses et ypotheques obligacions de tous et singuliers ses biens, biens de ses hoirs et ayans cause, avoir, tenir, garder, observer, conduire, appaisier, garantir, maintenir et deffendre envers et contre tous en jeugement et dehors ausdis George, Johan et Henry acheteurs, aleurdis hoirs et ayans cause lesdites choses vendues et fais contenuz à ces presentes lettres. Et non avoir fait ou tempz passé ne faire à tempz advenir choses par quoy le contenuz à ces presentes lettres ne obtienne force, vigueur & valleur, obligeant et soubmettant quant ad ce soy ledit Thiebaudt vendeur, sesdis hoirs et ayans cause pour quant ad ce estre constroints compeller par l’une et l’aultre des cours et jurisdiccions dudit Besançon, spirituelle, temporelle et toutes aultres cours et jurisdiccion ecclesiastes et seculeres ensemble, par une fois ou plusieurs, assavoir par sentence d’excommuniement et par la prinse, caption, vendicion, distraction et alienacion de sesdis biens de sesdis hoirs et ayans cause acquis et à acquerir quelcunques, nonobstans aucunes excepcions de fait, de droit, de stile, us ou coustumes ad ce contraires. À quoy ledit Thiebaudt vendeur a expressement renuncer et renunce par ces presentes lettres et au droit disant generale renunciacion non valloir se l’especiaule ne precede. En tesmoingnaige desquelles choses Nous, official dessusdit aux feaulx relacions dudit notre juré commandement digne et de foy que les choses dessusdites nous a relater ainsin estre faictes, passée, louhée, avons faiz mettre le seel de ladicte court de Besançon pendant à ces presentes lettres. Que furent faictes et donnée audit Montbeliart le troisieme jour du mois de julet l’an notre seigneur courrant mille quatre cens quatre vingts et quatre. Presens reverend pere en dieu frere Guillame Fallot abbé de Belchampz, frere Regnaudt Tixeran religieux dudit Belchampz, pbres., honnestes hommes Johan bailli de Dompbenoy demourant à Nommaix, Claud Cherpiot mareschal demourant à Saint Ursanne et maistre Leonardt Fingerlin notaire juré de ladite court de Besançon demourant audit Montbeliart, tesmoins ad ce appeller speciaulement et requis.

#	situation	nom	prénom	civilité	sexe	surnom	âge	résidence	origine	infos
1	vendeur	de VANDELINCOURT	Thiébaud	noble homme						écuyer
2	acquéreur	de MONSTUREUL	Georges	noble homme						le mot "bâtard" est biffé [il s'agit bien de Georges, bâtard de Montreux, fils de Jean, seigneur du lieu ; voir notre article]
3	acquéreur	de MONSTUREUL	Johan	noble homme						fils de #2
4	acquéreur	de MONSTUREUL	Henry	noble homme						fils de #2
5		de MONSTUREUL	Guy					Montreux		curé, fils de #2, pour les acquéreurs
6		de ROPPES	Philibert	(feu) noble homme						écuyer, ancien possesseur d'une partie des biens
7	témoin	FALLOT	Guillaume	frère						abbé de Belchamp
8	témoin	TIXERAND	Renaud	frère						religieux à Belchamp
9	témoin		Johan					Nommay		bailli de Dambenois (25188)
10	témoin	CHERPIOT	Claude					St-Ursanne (JU)		maréchal
11	témoin	FINGERLIN	Léonard	Me				Montbéliard		notaire de la cour de Besançon
12		PERRIOT	Guillaume					Montbéliard	Rougemont	notaire juré de la cour de Besançon, rédacteur

Dépôt d'un commentaire